Ngahau ana te korikori tinana. Kei ia tangata āna ake mahi pai, ahakoa kāhore anō koe kia mōhio noa, nā reira kia kaha ki te whakamātau i ngā mahi hou kia kitea te mea pai mōu. Ko te whāinga nui kia ngahau koe, ka tika.
Mō te kite atu i tētahi whare whakapakari tinana kei tō takiwā me āta whakariterite koe ki te rapu mōhio, ki te hanga tikanga hoki ki a koe anake. He wero nui ki te whakahihiko i a koe mō te wā roa, nō reira me mauritau rawa koe i tō whakatau i ngā herehere o ōu wā, o āu moni hoki. Kaua e wehi ki te patapatai i ngā kaimahi nā te mea kāore he painga o te noho kūare. Mā tēnei aratohu e āwhina i tō kōwhiringa i te whare whakapakari tinana pai rawa atu mōu.
Hei tīmatanga noa ake
Me pākiki te āhua, uiuia ōu hoa, tō whānau, me ōu hoa-mahi kia rongo koe ā rātou whakapānga, ā rātou wheako ki ngā whare whakapakari tinana me ngā karahe whakapakari. He oranga nui tēnei mōu. Tērā anō te tirotiro haere ki runga i te ipurangi mō ngā wāhi e tū tata mai ana me ngā ngohe ka taea. Ērā kohinga kōrero katoa ka āwhina i a koe ki te whakatau i ngā kōwhiringa. Whakapā atu, pātai atu mehemea he ara hei whakamātau māu. Ka wātea koe ki te titiro te wāhi te kapa hoki i mua i tō tāmokotanga.
Tūwāhi, tūwāhi, tūwāhi
Kōwhirihia he whare whakapakari tinana, he karahe, e hāngai ana ki te wā tika mōu. E tika ana me hāngai taua whare rā ki tō oranga me tō mahere – mēnā he pai ake kia tae atu koe ki te whare whakapakari tinana i mua, a muri rānei i te mahi, rapuhia tētahi e pātata rawa ana ki tō mahi. Mehemea mā te whakapakari tahi me tētahi atu e whakahihiko i a koe, whāia he oranga mōna hoki.
Oranga Ngākau
Whakatauria te whare whakapakari, te pokapū taha oranga, te karahe pai mōu, me te kite atu i ngā kaimahi e ngākaunui mai ana, e māhaki mai ana hoki. Kia ū ai koe ki ēnei mahi hou, me whai painga taua wāhi rā ki a koe. E kore rawa koe e pāngia te mataku, te whakamā rānei ki reira.
Pātaihia te matatau o ngā kaimahi ki ōu ake matea me ōu ake āhuatanga oranga. Tērā pea he hiahia anō ō rātou ka puta. Tērā ko tētahi kōrero a tō rata kia āta whakamōhiotia ai aua āhuatanga oranga me tōna whakaae i mua tonu i tō kuhu ki ngā mahi whakapakari tinana. He tikanga anō tērā kia kotahi atu koutou katoa i runga i te tika me te pono mōu.
He mea nui kia matua hāngai tō tikanga korikori tinana ki ōu matea, me noho haumaru hoki koe. Ka whai take nui tērā mehemea kua pakeke ake koe i te 65, mehemea he tūpatotanga oranga rānei ka raru i āu ngohe whakapakari tinana.
Kia rite te wā
Rapuhia te wā me ngā haora ka tuwhera te whare whakapakari tinana, te pokapū taha oranga rānei. Ko te nuinga ka tuwhera i ngā rā e whitu o te wiki. Ko ētahi ka tuwhera i ngā haora 24 katoa o te rā, engari pea, karekau he kaimahi ki reira hei aua wā katoa.
Āta tirohia te wātaka o ngā akoranga e whai whakaaro ana koe hei mahinga māu.
Waihangatia tētahi wātaka whaiora e raupapa mai ana aua akoranga e kaingākautia ana. Mā konā, ka mōhio koe pēnā ka taea te ea ai ōu hiahia, kia tutuki ai āu whāinga.
Taputapu
He whakaaro pai tērā kia tae ā-tinana atu koe ki te whare whakapakari tinana, ki tētahi akoranga rānei hei te haora kua whakaarohia māu. Mā konā, ka kite atu koe i ngā āhuatanga o taua wā. Anei ētahi āhuatanga hei titiro:
- He nui ngā taputapu mō ngā tāngata katoa
- He taputapu o ēnei rā, ā, kua āta tiakina e ngā kaimahi
- He pūoro pai e rongo ana mō ngā wā korikori tinana, ā, e pai ana aua pūoro ki a koe
- He tirohanga pai ki reira mō ngā wā korikori tinana
Kaimahi ngaiotanga whakapakari
Ko ngā kaimahi e aratakina ana tō karahe, e mahi ana rānei i a koe i roto i te whare whakapakari tinana, ka tino whai take mai nei ki a koe. Āta whakarite koe ki te tūtakitaki, ki te mātakitaki hoki i a rātou e mahi ana. Whakaarohia hoki, he tūmomo tangata pērā ia i tō rata, pērā anō i tō hoa piri nā te mea ko te mauri o tētahi, o tētahi atu rānei ka āwhina koe ki te whakatutuki i ōu hiahia whakapakari tinana. Me mārama koe ki āna wheako ngaiotanga whakapakari tinana, ka tika hoki kua rēhitangia e tō kaiwhakangungu ki te Register of Exercise Professionals. He rōpū motuhake tērā, he rōpū hua kore hoki ka pupuritia te rehita o ngā whare whakapakari tinana me ngā ingoa tāngata kua whakawhiwhia ngā taumata paerewa o te ao whānui tonu.
Ko te mahi a te kaiwhakangungu whaiora, he whakaū kaha i a koe ki āu mahi. Kei te nuinga o ngā whare whakapakari tinana me ngā pokapū whakapakari tinana āna ake kaiwhakangungu whaiora, engari he utu anō tērā ka pā. Kei te takiwā o te $50 ki te $90 ia haora taua utu, ā, ko te utu toharite, he $65 ia haora.
He tikanga haurua haora kē ā ētahi kaiwhakangungu whaiora, nā reira pātai atu. Tērā pea ka whakarite koutou ko tō whānau, kōrua rānei ko tō hoa ki te whakangungu tahi kia tohatoha i te utu ōrite i waenganui.
Mahi ā-rōpū me ngā akoranga
Mena e ngākau pai ana koe ki ngā ngohe ā-rōpū me ngā akoranga whakapakari tinana, whakamātauria te whānuitanga atu o ngā tūāhua rerekē. Tērā ngā akoranga haukori ngāwari, yoga, pilates, tae atu ki ngā akoranga i runga i ngā taputapu hātepe, papupapu, eke pahikara hoki. Tērā pea ka kaingākau koe ki ngā tūmomo ngohe, ki ngā tūmomo taikaha hoki.
Tērā hoki ngā whare whakapakari tinana ka whakahaerehia ngā whakangungu mō ngā rōpū tokoiti i tētahi haora ia wiki. He huarahi anō tērā kia aronui mai rātou ki a koe i roto i āu mahi.
Ngā Ratonga
Āta whakaarohia ōu ake hiahia ki tētahi whare whakapakari, ki tētahi pokapū oranga tinana. Me whai whakaaro nui ki ngā take e whai ake nei:
- He aha ngā tūāhua o ngā tikanga whakahaere me ngā paerewa ukauka?
- Kei reira he puna kaukau, he puna kauhoe, he ratonga mirimiri tinana, he wāhi koromamahu, he wāhi tiaki kōhungahunga?
- Ki te whakamahi ērā tūāhua, ka pā he utu anō ki runga ake?
- Kei reira he pūrere whakamaroke makawe, he wāhi motuhake mō ōu kākahu?
- He mōhiotanga whai oranga i ngā kai kei korā?
Whai utu, kirimana
Kei te nuinga o ngā whare whakapakari me ngā pokapū oranga tinana ngā momo ara whakautu, tērā mō ia marama, tērā rānei mō ia wiki. Rite tonu te pai ake o tērā tukanga ki tērā o te utu nunui i mua i ngā mahi rā. Nā reira, me tika tonu tō pātai atu mō ngā tūāhua whakautu katoa.
Mēnā ka haina koe i tētahi kirimana mō tētahi roanga o te wā, me tika anō tō āta pānui i taua kirimana ka noho i waenganui i a kōrua ko te whare whakapakari, o te pokapū oranga tinana rānei.
Whakaarohia ēnei:
- E māraurau ana koe ki ētahi hekenga utu? Hei tauira, mō ngā tāngata e mau ana i tētahi puka rongoā kākāriki, ngā ākonga kura, te hunga kaumātua, mō te hau atu i ngā wā pōnguru
- He moni āu hei whakautu ngā nama?
- Kua tau pai koe ki te whakaritenga whakautu – arā, he utu nunui mai i te tīmatanga, he utu haere rānei i a koe e haere ake ana?
- Ka pēhea te roa o tō whakapūmau ki taua kirimana?
- E mārama kau ana i ngā utu katoa?
- He aha ngā whakawhiu mēnā ka whakakorehia ana tō rehitangata hei mema?
- E wātea ana koe ki te whakawhiti atu i te toenga rehitanga ki tētahi atu tangata?
Nō te rā tuatahi
Kia taunga koe ki tō whare whakapakari hou, me whakapiripiri ki ngā kaiako, me tono āwhina hoki mō te tangata kātahi nei ka tīmataria. Ka tika mā rātou koe e ārahi i a koe ki ngā hātepe hei mahi, ki ngā āhua noho haumaru, ki te tāwhio haere i roto i tēnei taiao hou. Mēnā kei tētahi whare whakapakari uiuia rātou kia whakarite hōtaka hei āwhina i a koe ki te whakatakoto whāinga me te whakatutuki i ngā tohu nui o tō hauora. He mea pai hoki kia mātakina ia wā, ia wā kia arotake haere i te anga whakamua me ngā whāinga e hāngai ana, e taea ana te whakaine hoki.
Kuputaka
- koromamahu, steam, sauna
- māraurau, eligible
- pākiki, mahira, curious
- pokapū taha oranga, fitness centre
- pōnguru, off-peak
- ratonga, facilities, services
- ukauka, discount
- utu toharite, average cost
- whare whakapakari tinana, gym (exercise, training)
For the English version of this page, go to Going to the gym.
This page was produced together with:
