Eke paihikara

Hei kawenga hāereere, kāore i tua atu i te haere mā runga paihikara. Horekau he parahanga, ko koe tonu rā te kaha, he iti noa iho te hanga, otirā he āhua hohoro mō te haere i ngā tāone ina he poto noa te haerenga atu (iti iho i te 5 kiromita).

Photo of a cyclist on a hill looking out over Auckland Harbour. I tua atu i te haere mai i te tī, ki te tā, ko te eke paihikara tētahi ngohe papai a Te Rēhia, he iti noa tōna utu, me te mea hoki, ka nui tonu ngā painga hei oranga.

Ahakoa e eke paihikara ki te mahi, ki te kura, ki ngā mahi takohe, ki te whakapakari tinana rānei, kei raro iho nei ētahi mōhiotanga kia ngahau ake, kia whai take hoki mōu, mō tō whānau hoki.

Hei tīmatanga

Mehemea kei te tīmatanga rawa koe, kia ngāwari! Mehemea ka pau te hau, ka kore rānei koe e āhei ki te kōrerorero i a koe e eke paihikara ana, ka kino rānei te ngenge me te mamae ki ōu waewae, ka whara pea koe.

I te tīmatanga, ka nui hoki te hāereere kia toru, kia whā rānei ngā wā ia wiki, ā, kia ngāwari noa iho aua hāereere mō ngā mineti 15–20, ka mutu.

He ture haumaru

  • Me maea. Me arokā. Me mataara. Me mōhio.
  • Me mahara ake ko te noho ture tonu te New Zealand Road Code me te Code for Cyclists e whai take ana ki te tangata eke paihikara.
  • Me matua whakamau i tō pōtae mārō – e ai ki te ture tonu nei! Tirohia tētahi pōtae mārō ka tika tonu ki te Cycle Helmet Safety Standard. Kei ngā pōtae tika rawa atu, he anga mārō i waho, he uhinga pāhuka i roto. Me tau mai te noho me āhuru hoki.
  • I ngā wā hāereere mā runga paihikara i te pō, i te kākarauritanga rānei, me whakaatu atu ngā rama, ngā ata, me ngā kākahu mumura.
  • Ki te whakamau he tarau poto me he kahu ringa e whakapuru ana tae atu ki ngā hū mō te haere mā runga paihikara, ka āhuru tō ngākau, ka harikoa, ka ngahau.

Taha oranga

A group of mountain bikers heading over the hill towards a lake. Ko te tīwhiri ki te whakapakari ake i tō hauora me āta whakapiki i te roanga me te kahanga o ngā haerenga. Ā, ko tētahi tikanga pai hei whai ko te whakapiki i te roanga o ia haerenga mā te 10% iti iho ia te wiki, ia te wiki.

Me whakamātau ngā haerenga mā runga paihikara ki ngā wāhi rerekē, hei ngā wā rerekē, i ngā huarere rerekē, tae atu ki ngā papa whenua rerekē. Mā konā ka pai rawa ngā wheako me te tupu kaha o tō māiatanga mā runga paihikara. Engari kia mataara, kia tūpato hoki ki ngā hautini. Hei tauira, mēnā kei muri kē te hau ka pai pea tērā nā te mea ka pehi haere te hau i a koe i runga i tō paihikara.

Kaua e whakapāhunu ina kei tō kanohi kē te hau e pupuhi ana, nā te mea he mātātaki tērā ki tō hauora. Ki te tangata Māori, ko Tāwhirimātea te atua o ngā hau katoa nā reira ko tōna wairua tērā te hāpai, te mātātaki hoki i te hunga hāereere mā runga paihikara. Kia pūrangiaho, tēnā tirohia tēnei rīpene ataata i raro iho nei.

Me matua whai wā ki te āta tiaki i tōu ake tinana. Nā reira e tika ana kia āta whakariterite ētahi rā whakatā ia wiki, ā, kia mahi ngāwari rawa i te wiki tuatoru o tō mahere whakapakari tinana.

Tauwhāinga paihikara

Ko te tauwhāinga paihikara tētahi tino rautaki ki te whakaihiihi, ki te whakawana hoki i a koe me te whakatenatena i ētahi atu ki te hau atu ki ngā tūmomo kaupapa korikori tinana. Tirohia te pae tukutuku Cycling New Zealand kei reira te rārangi tauwhāinga paihikara me ngā rerenga kētanga o tēnā ki tōna āhua, o tēnā ki ōna tūwāhi o te whenua, o tēnā ki tōna tūāhua ake.Photo of a big group of road cyclists, wearing matching outfits.

I whakatūria ngā tauwhāinga pērā i te Iron Māori me te TriMāori hei whakatenatena te pikinga ake o te taha oranga me te kuhu haere mai o te tangata, ā, tutuki noa. Kei kō atu ētahi atu hinonga paihikara kia whai wāhi ai te tangata ki te mātakitaki i ngā horahanga o te whenua, ki te rēhi rānei i ngā tauwhāinga whakataetae mō tērā momo tangata.

Paihikara pāpori

He painga tā te haere tahi me ētahi atu? Ki te hiahia te haere tahi me ētahi atu, whakatenatenahia ō hoa me tō whānau kia piri mai ki āu haerenga. Mā tō kaha ki te pānui haere ki a rātou i runga i ētahi haerenga popoto ki ngā pāka, ki ngā puna kauhoe, kāore he tīmatanga pai i tua atu. Hei whakaaro anō hoki, me kuhu atu koe ki tētahi kapa eke pahikara. Pātaihia te toa hoko paihikara ki tō takiwā, ki te Whare Hākinakina o tō takiwā rānei, arā, regional sports trust me ngā kaupapa ka taea kei tō rohe.

Hei tīmatanga mā te hunga tamariki

Ko te eke paihikara tētahi mahi a rēhia tino pai mō te whānau, ā, he pai anō tērā mō te taha oranga a ngā tamariki, pērā i

  • Photo of a father and son cycling down a suburban street. Te korikori tinana me te whakapiki hauora
  • Te ako i ngā ture haumaru i te rori, me te hāereere mā runga paihikara
  • Te tākaro tahi me te whakahoahoa wheako ki te taha o te whānau me ngā hoa
  • Te whakapakari ake i te kaha o te tinana
  • Te māiatanga mō te hāereere i runga rori

Mai i te wā o te tamarikitanga ka rawe tonu te hāereere mā runga paihikara ina noho ki te tūru tamaiti ririki, he tauaru ki te paihikara a tētahi matua, ngā paihikara whaiwhai haere, ngā paihikara toru wīra, ngā paihikara tū whārite, tērā hoki ko ngā paihikara whai wīra whakangungu.

He mea nui i te tīmatanga kia akohia ngā tamariki ki ngā whanonga haumaru mō te eke paihikara. Me matua waia hoki rātou ki te mau pōtae mārō i ngā wā katoa, ā, me haumaru rawa ngā wāhi whakangungu i ngā akoranga tika.

Kei te pae tukutuku the official New Zealand code for cyclists ētahi mōhiotanga e pā ana ki ngā pūkenga hei akoranga matua mā te hunga tamariki kia haumaru ai ā rātou tūāhua eke paihikara.

A young man cycling to work along the waterfront. Eke paihikara ki te mahi

Ki te haere mā runga paihikara ki te mahi, arā anō

  • ngā painga ki te taha oranga, ki te taiao hoki
  • te penapena utu mō te whakakora, te whakatū motoka, te haere mā runga pahi hoki
  • te whakaiti i ngā motoka tinitini i runga i ngā rori
  • te whakaiti i ngā āhua pakaru haere o ngā rori me ngā arahanga
  • te whakaiti i ngā āhua pakaru haere i tō motoka (mehemea he motoka tōu)

I mua i te puta atu i runga i tō haerenga, āta rangahaua te tawhiti me te wā i runga i te huarahi kia haumaru tonu koe. Tirohia tētahi pae tukutuku pēnei i Google Maps. Whakapā atu rānei ki te kaunihera o tō rohe mā rātou koe e āwhinatia ai.

Mehemea he tawhiti rawa tō haerenga, tērā pea ka hāereere mā runga paihikara, ka haere rānei ki runga i ngā ratonga hāereere o te iwi whānui, ka haere rānei mā runga i tōu ake motoka.

Mehemea ka kawe koe i tō paihikara ki muri i tō motoka, ko tā te ture e tohu ana kia mahea tonu te kite atu i tō pereti raihana. Nā konā e taea ana te tiki atu i tētahi pereti raihana rangitahi mai i te Waka Kotahi hei herehere ki muri i tō motoka. Tirohia te pae tukutuku nei supplementary registration plate mō ētahi atu mōhiotanga.

Photo of a group of cyclists stopped before the top ridgeline of a hill. Piki maunga mā runga paihikara

Ko te piki maunga mā runga paihikara tētahi tino rautaki mō te taha oranga, ā, he tino ngahau hoki tērā! Mā te hāereere mā runga paihikara ka rerekē tō tirohanga atu ki tō tātou whenua rangatira nei ahakoa he kite tuatahi, he kite tua aha atu rānei. Ka pupū ake ngā mīharotanga o tō ngākau ki te ātaahua o Aotearoa – ngā waonui, ngā takutai, ngā waenga parae. Kei reira hoki ngā huarahi mō te iwi whānui i te motu puta noa ka whakamātauria tō taha oranga me tō māiatanga. Tirohia te pae tukutuku o te kaunihera o tō rohe, ki te pokapū tuku mōhio rānei ki te hunga tāpoi e pā ana ki ngā huarahi mō ngā paihikara o tō ake takiwā.

Ina ka piki maunga koe mā runga paihikara me whai koha koe ki ērā atu tāngata kei runga i te huarahi. Pupuritia te taha mauī, whakawāteatia ngā tāngata e piki haere ana, e hīkoi ana, me ngā kararehe mehemea ka taea.

Ki te takatū koe ki ngā āhuatanga katoa me hāereere tahi koe me ētahi atu, me whakamau waea pūkoro hoki. Kei tūpono mai tētahi hauata, me hanga noa atu tētahi tukanga haumaru i waenganui i tō tira haere.

Hāereere

Photo of two cyclists heading out on the cycle trail. Ko te hāereere mā runga paihikara tētahi kaupapa pai rawa atu hei hararei ngangahau, hei tirohanga ake ki Aotearoa nei.

Ina whakariterite ai koe i tētahi hāereere me rite rawa koe kia rite! Me ako koe i te pēhea o te whakatikatika pokapoka, me taunga koe ki te pānui i ngā mahere whenua, me pakari hoki tō tinana mō te eke paihikara. He whakaaro pai kia whakapakari ake te tinana i runga i ētahi hāereere poto mō ngā rā noa iho, ka mutu, ka rite koe mō tētahi hāereere roa rawa.

Ngā Haerenga o Aotearoa whānui

Ko Ngā Haerenga o Aotearoa whānui tētahi kōtui huarahi kei tua atu i ngā rori matua. He huarahi maha tonu i matua hāngai mō ngā paihikara ki te motu whānui hei painga mō te taha oranga, hei mīharotanga hoki mō te tirotiro haere ki te whenua, te ahurei, ngā taonga tuku iho o Ranginui rāua ko Papatūānuku, katoa, katoa, he rangatira! Tirohia te pae tukutuku New Zealand Cycle Trail mō ētahi atu mōhiotanga.

Te kōwhiri me te tiaki paihikara

Kōwhiringa Paihikara

He nui tonu ngā kōwhiringa paihikara e hāngai ana ki ōu ake hiahia. Tērā te momo paihikara me ōna nihohuri mō ngā hāereere i waenga parae me ngā pukepuke; tērā rānei te momo paihikara me ōna wīra whāiti e tino pai ana mō ngā hāereere roa rawa.

Tirohia te pae tukutuku Bike Buyer’s Guide hei āwhina, hei tohutohu i te paihikara tika mōu ake.

Photo of 9 cyclists posing with their bikes. Paihikara whai hiko

He rite tonu ngā paihikara whai hiko ahakoa tērā tūāhua anō. E taea te whakahaere mā te whakarere pētara, mā te tūāhua motopaika rānei. He mea whakahihiko tērā ki tētahi punga hiko. Ko ngā painga katoa o te paihikara whai hiko ka rite tonu ki ērā o te paihikara noa iho mō te taha ki te whakakora, te utu ki te wāhi whakatū paihikara, me te taha oranga. Tino whai take anō hoki mō ngā hāereere āhua roa, mō ngā hāereere piki puke rānei. 

Tiaki paihikara kia haumaru

Ahakoa tō haere mā runga paihikara ia te wā, ahakoa ka roa te wā o tērā mahi, ka tika hoki me āta tirotiro ki tō paihikara ia tau kia haumaru, kia rite hoki mō te hāereere i runga i ngā rori.

Rite tonu ngā toa paihikara ki te tirotiro arowhai, ki te whakapaipai ake hoki ngā paihikara, ā, he pai noa te utu ka pā.

Kia mōhio ai koe i te pēhea o te tiaki paihikara, te whakapaipai hoki i tō paihikara, tirohia tēnei pae tukutuku – Self-help maintenance guide (PDF, 390 KB).

Hei āpiti, anei tētahi rīpene ataata whakamārama i ngā mahi arowhai kia haumaru tō paihikara, kia whakawaia hoki koe i mua i te whakamahi i tō paihikara. Tirohia, akohia!

Mō ētahi atu mōhiohio


Kuputaka

  • hauata, accident
  • maea, visible
  • nihohuri, gear (teeth)
  • pāhuka, foam
  • parahanga/pokenga, pollution
  • pokapoka, puncture
  • takohe, leisure
  • whakakora, fuel
  • whakapāhunu, discourage
     

For the English version of this page, go to Cycling.

This page was produced together with:

ACC – Prevention. Care. Recovery. Te Kaporeihana Āwhina Hunga Whara.NZ Transport Agency: Waka Kotahi. Sport New ZealandToi Tangata.

Back to top